HEALTHY LIFESTYLE SOLUSYON UPANG MAGING MAS PRODUKTIBO ANG MGA KAWANI NG PAMAHALAANG LOKAL – DR. JOB BRION

San Pablo City – Matagumpay na naisagawa ng City Health Office sa pamumuno ni Dr. Job D. Brion ang paglulunsad ng kampanya tungo sa isang Healthy Lifestyle. Ang Healthy Lifestyle ay isang nasyunal na programa na una ng inilunsad ng Department of Health para sa mga opisyal at ordinaryong manggagawa ng gobyerno.

     Samantala, bilang pakikiisa ng pamahalaang lokal ay agad pinasimulan ng mga kawani ng CHO ang sama-samang pag-eehersisyo noong nakaraang Miyerkules ng hapon, February 16 sa Doña Leonila park. Ayon kay Dr. Brion, mahalagang mapanatiling malusog ang pangangatawan ng mga empleyado upang mas maging produktibo ang mga ito. Idinagdag pa nito na panahon na upang ang kalusugan ay gawing prayoridad at pagtuunan ng pansin upang makaiwas sa anumang banta ng pagkakasakit  lalo’t higit ngayong mga panahong ito na nagiging unpredictable ang lagay ng ating panahon kung kaya’t madalas ay apektado  rin ang kalusugan ng tao.

     Idinagdag pa ni Dr. Brion na nakatakda nilang isagawa ng sama-samang pag-eehersisyo  isang beses kada linggo. Malugod rin nilang inaayayahan ang lahat ng mga kawani na sumali at makiisa sa naturang programa sa ikaaayos na rin ng kanilang mga kalusugan.

     Suportado naman nina Mayor Vicente B. Amante at  City Administrator Loreto “Amben” S. Amante ang “healthy lifestyle program” ng CHO para sa lahat ng mga kawani. Ayon sa Adminsitrador, labis na ikinatuwa ni Mayor Amante ang inisyatibo ng CHO na ma-ipromote sa lahat ng mga kawani ang pagkakaroon ng isang malusog na pamumuhay. Naniniwala ito na mas magiging maganda at mahusay ang paglilingkod ng mga ito sa taumbayan kung ang mga empleyado ay malusog at masigla. (CIO-San Pablo)