HELMET HINILING NG MEDIA SECTOR SA SANGGUNIANG PANGLUNSOD NA PAG-ARALAN ANG PAGBABAWAL NG PAGGAMIT SA CITY PROPER

San Pablo City – Nakaabot sa kabatiran ng mga miyembro ng Sangguniang Panglunsod sa pamamagitan ng isang liham kay Vice Mayor Angie Yang buhat kay G. Flor David  ang isang mahalagang panukalang ipagbawal ang paggamit ng helmet sa city proper mula sa kahilingan sa sektor ng media.

            Agad namang ipinasa  sa Committee on Police, Fire, Penology, Public Safety and Order at sa Committee on Energy, Transportation and Telecommunications ang kahilingan na mapag-aralan ang isang panukala na huwag pagamitin ng helmet o takip sa mukha ang lahat ng mga nakamotor sa tuwing sasapit sa bisinidad ng city proper. Magkaroon ng limitasyon sa takbo ng mga motor sa city proper kung saan ay hanggang 30 km/hr. lamang ang tulin at sa highway lamang gagamit ng helmet sapagkat lubhang peligroso ito bilang pook lakbayan.

            Binase ang naturang suhestyon sa mga nakukuhang report buhat sa pulisya na karamihan sa mga krimeng naisagawa sa Lunsod ay may involved na mga nakamotorsiklong kalimitan ay may angkas o yung kilala rin bilang motorcycle in tandem na pawang mga hindi nakuha ang identity dahilan na rin sa nakahelmet o di kaya’y may taklob ang mukha. Napag-alaman rin na karamihan sa mga motor na ito ay walang plaka at hindi rehistrado. (CIO-San Pablo)

CITY PLANNING AND DEVELOPMENT OFFICE NAG-ULAT NG ACCOMPLISHMENTS

San Pablo City – Pinuri at pinasalamatan ni City Administrator Loreto “Amben” S. Amante ang  City Planning & Development Office sa pamumuno ni G. Rolly Bombio noong nakaraang Lunes, May 30 sa pagsasagawa ng Flag Raising Ceremony sa One Stop Processing Center na pinamunuan ng nabanggit na departamento.

            Aminado si City Admin. Amben na ang CPDO ay ang lagging katuwang ng  pamunuan ni Mayor Vicente B. Amante sa pagbalangkas ng  master development plan para sa Lunsod.  Kasama na rito ang pagsasaayos ng mga nararapat, napapanahon at kapaki-pakinabang  na mga  proyekto na maaring isama sa 20% development fund.

            Iniulat rin ng naturang tanggapan sa pamamagitan ni Gng. Lorna Alcantara, Proj. Dev’t Officer IV, na matagumpay silang nakapagbigay ng assistance at nakapagmonitor sa pagsasagawa ng mga proyekto.  Gayundin ang pagsasaayos ng mga prosesong nakapaloob rito sa pamamgitan ng mga isinumiteng Financial Report sa 20% Development Projects.

Isa rin sa mahalagang ginampanan ng naturang tanggapan ay ang economic development, at zoning at land use regulation ng Lunsod. Buong pagmamalaki ring nabanggit ni Gng.  Alcantara na para sa taong 2010 sang-ayon sa ratings na ipinagkaloob ng Department of Interior and Local Government sa performance ng lunsod sa 6 na area kung saan ay nakapaloob ang Local Legislation, Development Planning, Revenue Generation, Resource Allocation and Utilization, Customer Service and Human Resource Management & Development ay   Above Average ang nakuhang ratings ng Lunsod na lalo namang ikinagalak ni City Admin. Amben. (CIO-San Pablo)

ISKOLAR-BOS SEMINAR DINALUHAN NG SAN PABLO CITY SK FEDERATION

San Pablo City – Dumalo sa 3 araw na Integrated Sangguniang Kabataan Organization, Leadership and Reorientation Program – Basic Orientation Seminar (ISKOLAR-BOS) ang mga opisyal ng Sangguniang Kabataan Federation sa pangunguna ni SK President Gueren Jon M. Amante sa  Caliraya, Recreation Center, Brgy. Lewin, Lumban Laguna noong nakaraang May 23 hanggang 25.

            Dahilan na rin sa kinikilala ang kontribusyon ng mga kabataan sa pagbuo ng isang matatag na lipunan ay matamang sinanay ang mga SK officials sa naturang ISKOLAR-BOS upang higit pang pag-ibayuhin ang potensyal ng mga ito sa paglilingkuran at pamumuno.

Ikinatuwa naman ni SK President GJ Amante na nabigyan sila ng pagkakataon na makadalo sa mga pagsasanay tulad ng nabanggit sapagkat naniniwala ito na  sa pamamagitan ng isang komprehensibong programa gamit ang iisang pamamaraan at may malinaw na itinalagang mithiin ay lalo pang mapapalawig ang kanilang mga kakayahan at tungkulin bilang mga youth representatives.

Sinabi pa nito na sa lawak ng katungkulan at hamon na nakaatang sa kanilang mga balikat bilang siyang mga susunod na mga pinuno ng bansa ay makakaasa ang taumbayan na gagawin nila ang kanilang buong kakayahan upang sa lagi na ay maging kapaki-pakinabang at maging totoo sa kanilang mga sinumpaang tungkulin. (CIO-San Pablo)

SAN PABLO CITY FEDERATION OF WOMEN’S CLUB, LAGUNA CHAPTER GINAWARAN NG CERTIFICATE OF ACHIEVEMENT

San Pablo City – Buong pagkakaisang ipinasa ng mga miyembro ng Sangguniang Panglunsod sa pangunguna ni Vice Mayor Angie Yang ang isang resolusyong ng pagbati sa San Pablo City Federation of Women’s Club, Laguna Chapter sa pangunguna ni Gng. Eva Ticzon noong nakaraang Martes, May 24 sa pagsasagawa ng ika-47 regular sesyon.

         Kinilala ang inisyatibo ng naturang Pederasyon sa pagpaplano at implementasyon ng mga gawain, at proyekto mula Hunyo 2010 hanggang Mayo 2011 kung saan ay nakatugon sa mga adhikain ang Pederasyon na makagawa ng kaibahan at pagbabago sa buhay ng mga kababaihan at kabataan na tungkol sa kalusugan, ekonomiya, akademiko at kalagayan sa lipunan. 

Ang Certification of Achievement ay iginawad sa SPCFWCL ng National Federation of Women’s Club of the Philippines noong nakaraang May 21, 2011 sa taunang pagpupulong na isinagawa sa Lingayen, Pangasinan. (CIO-San Pablo)

SAN PABLO INMATES NAGSANAY SA BAKING AT MEAT PROCESSING

San Pablo City- Sumailalim sa four days basic training on baking at meat processing and preservation ang mga inmates ng San Pablo City District Jail nuong Mayo 17-20, 2011 ay sa pamumuno ni J/CINSP Jose Gemelo C Taol (District Jail Warden-Male Dorm), JINSP Marvi A Diaz (District Jail Wardress-Female Dorm) at SJO4 Liza I Valentiono(IWDO) at sa pakikipagtulungan nina City Administrator Amben Amante at Vice-Mayor Angie Yang.

                       Ang seminar-training ng Meat Processing ay tinuruan ang mga inmates ng paggawa ng skinless longganisa, pork sausage, tocino at tapa. Samantalang sa baking naman ay natuto silang gumawa ng spanish bread, pandesal, pizza dough at molo wrapper.

                       Nagsilbing trainor sina Gng. Jin Alcantara para sa meat processing at baking at si G. Ruben de los Santos para sa meat processing.

                       Layunin ng SPCDJ na maturuan at sanayin ang mga inmates para sa kanilang dagdag kaalaman at pangkabuhayan sa loob ng piitan na magagamit rin sa muli nilang pagbalik sa ating komunidad. (CIO-SPC)